Follow

Subscribe

ജിറാഫിന്റെ നൃത്തം

Aesop's Fables

ദയവായി ശ്രദ്ധിക്കുക! ഈ ഉള്ളടക്കത്തിന്റെ പകർപ്പവകാശം സംരക്ഷിച്ചിരിക്കുന്നു. അനുവാദമില്ലാതെയുള്ള ഉപയോഗം നിയമപരമായ നടപടികൾക്ക് ഇടയാക്കുന്നതാണ്. കൂടുതൽ അറിയൂ...

പണ്ടു പണ്ടൊരിടത്ത് ഒരു മനോഹരമായ കാടുണ്ടായിരുന്നു. ആ കാട്ടിലായിരുന്നു തന്റെ  പ്രജകളായ മൃഗങ്ങളെയെല്ലാം വളരെയധികം സ്നേഹിച്ചിരുന്ന സിംഹരാജാവ് പാർത്തിരുന്നത്.  ഒരു ദിവസം രാജാവായ സിംഹം മറ്റു മൃഗങ്ങൾക്കായി കാട്ടിൽ ഒരു വിരുന്നൊരുക്കി. കാട്ടിലെ എല്ലാ മൃഗങ്ങളും സന്തോഷത്തോടെ ഈ വിരുന്നിൽ പങ്കെടുത്തു. സിംഹരാജാവ് തന്റെ അതിഥികളായി എത്തിയ മൃഗങ്ങളെയെല്ലാം സ്വീകരിച്ചു. അവർക്ക് മതിവരുവോളം ഭക്ഷണവും നൽകി. മാത്രമല്ല വിനോദത്തിനായി വിരുന്നിനോടൊപ്പം കലാപരിപാടികളും നടത്തി. അതിനായി സിംഹരാജാവ് ആദ്യം ക്ഷണിച്ചത് പാട്ടുകാരനായ കുയിലിനെ ആയിരുന്നു.

കുയിൽ അതിമനോഹരമായി തന്നെ പാടി. കാട്ടിലെ മൃഗങ്ങളെല്ലാം തന്നെ കുയിലിന്റെ പാട്ട് വളരെയധികം ആസ്വദിച്ചു. കുയിൽ പാടി കഴിഞ്ഞതും മൃഗങ്ങൾക്കെല്ലാം ഒരു നൃത്തം വേണം എന്നായി. ഇതുകേട്ട സിംഹരാജാവ് കാണികളായി ഇരുന്ന മൃഗങ്ങളോടായി ഇപ്രകാരം പറഞ്ഞു 

“നിങ്ങളിൽ നൃത്തം ചെയ്യാൻ അറിയാവുന്ന ഒരാൾ സ്വയം മുന്നോട്ട് വന്നു നൃത്തം ചെയ്യുക. എല്ലാവരെയും സന്തോഷിപ്പിക്കുക.”

സിംഹരാജാവ് ഇതു പറഞ്ഞതും കുരങ്ങൻ സന്തോഷത്തോടെ നൃത്തം ചെയ്യുവാനായി മുന്നോട്ടു വന്നു. അവൻ വളരെ മനോഹരമായി തന്നെ നൃത്തം ചെയ്തു. ഇതുകണ്ട മറ്റു മൃഗങ്ങൾക്കെല്ലാം സന്തോഷമായി. അവർ ആർപ്പു വിളിക്കാനും കൂടെ ആടാനും തുടങ്ങി. കാണികളുടെ ആർപ്പു വിളികളിൽ നിന്നു അവർ തന്റെ നൃത്തം നന്നായി ആസ്വദിക്കുന്നു എന്ന് മനസിലാക്കിയ കുരങ്ങൻ ഉത്സാഹത്തോടെ തന്നെ നൃത്തം ചെയ്തു. എന്നാൽ കുരങ്ങന്റെ നൃത്തം എല്ലാവരും ആസ്വദിക്കുന്നത് കണ്ട ജിറാഫിന് ഇതു തീരെ രസിച്ചില്ല. അവൻ എല്ലാവരോടുമായി പറഞ്ഞു 

“എത്ര മോശമായിട്ടാണ് ഈ കുരങ്ങൻ നൃത്തം ചെയ്യുന്നത്. നിങ്ങൾ എന്തിനാണ് ഇതുകണ്ട് ഇത്രയും ആവേശം കൊള്ളുന്നത് ?”

എന്നാൽ ജിറാഫ് പറഞ്ഞത് മറ്റു മൃഗങ്ങൾക്കൊന്നും തന്നെ തീരെ ഇഷ്ടപ്പെട്ടില്ല. ഇതു കേട്ടു കൊണ്ടു നിന്ന ഒരു കുറുക്കൻ ജിറാഫിനോട് ചോദിച്ചു 

“നിനക്ക് കുരങ്ങൻ നൃത്തം ചെയ്യുന്നത് ഇഷ്ടപ്പെടാത്തത് തീർച്ചയായും അതിലും നന്നായി  നിനക്ക് നൃത്തം ചെയ്യാൻ കഴിയുന്നത് കൊണ്ടായിരിക്കും അല്ലേ ?”

ഇതുകേട്ട ജിറാഫ് ഉടൻ തന്നെ പറഞ്ഞു 

“തീർച്ചയായും, ഈ കുരങ്ങനെക്കാളും മനോഹരമായി നൃത്തം ചെയ്യാൻ എനിക്ക് കഴിയും.”

ജിറാഫിന്റെ വാക്കുകൾ കേട്ട ഒരു മാൻ കുരങ്ങന്റെ നൃത്തം കഴിഞ്ഞതും ഉടൻതന്നെ വിളിച്ചു പറഞ്ഞു 

“അടുത്തതായി നൃത്തം ചെയ്യാനായി വേദിയിലേക്ക് വരുന്നത് ഒരു ജിറാഫാണ്.”

മാൻ പറയുന്നത് കേട്ട മറ്റു മൃഗങ്ങൾ സ്തബ്ധരായി. 

“ഒരു ജിറാഫ് നൃത്തം ചെയ്യുവാനോ? എങ്ങനെയാണ് ഈ ശരീരവും വച്ചു ഒരു ജിറാഫിനെ കൊണ്ട് നൃത്തം ചെയ്യുവാൻ കഴിയുന്നത് ?”

അവർ പരസ്പരം പിറു പിറുത്തു. 

എന്നാൽ ഏവരെയും ഞെട്ടിച്ചു കൊണ്ട് ജിറാഫ് നൃത്തം ചെയ്യുവാനായി വേദിയിലേക്ക് വന്നു. അവൻ തന്റെ നീണ്ട കാലുകളും വലിയ വയറും ഉയരം കൂടിയ കഴുത്തും വച്ചു നൃത്തം ചെയ്യാൻ തുടങ്ങി. എന്നാൽ ജിറാഫിന് അവന്റെ നീണ്ട കാലുകൾ കൊണ്ട് നൃത്തം ചെയ്യാൻ കഴിയുന്നുണ്ടായിരുന്നില്ല. ജിറാഫിന് കുരങ്ങന്റേതു പോലെ മെയ് വഴക്കം ഇല്ലായിരുന്നു  എന്നിട്ടും അവൻ പിന്മാറാൻ തയ്യാറായില്ല. അവൻ വീണ്ടും വീണ്ടും ശ്രമിച്ചു കൊണ്ടേയിരുന്നു. 

 ജിറാഫിന്റെ നൃത്തം കണ്ട കാണികൾക്ക് രോഷം അടക്കാൻ ആയില്ല. അവർ ജിറാഫിനോട് വേദിയിൽ നിന്നും ഇറങ്ങാൻ ആവശ്യപ്പെട്ടു. കുരങ്ങന്റെ നൃത്തം കണ്ടു കൈയടിച്ച കാണികൾ ജിറാഫിനെ കൂകാൻ തുടങ്ങി. അസൂയ മൂത്തു തനിക്കു പറ്റാത്ത പണിക്കു മുതിർന്ന ജിറാഫിനെ എല്ലാവരും പരിഹസിക്കാൻ തുടങ്ങി. അവസാനം നാണം കെട്ട് അവന് വേദിയിൽ നിന്നും തല കുനിച്ചു മടങ്ങേണ്ടതായും വന്നു. അപമാനിതനായ ജിറാഫ് ആ കാട്ടൽ നിന്നും തന്നെ എന്നന്നേക്കുമായി ഓടി പോയി. പിന്നെയാരും ആ ജിറാഫിനെ ആ കാട്ടിലെങ്ങും കണ്ടതേയില്ല. അങ്ങനെ അസൂയ കാണിച്ച ജിറാഫിന് തന്റെ വാസസ്ഥലം തന്നെ ഉപേക്ഷിക്കേണ്ടതായി വന്നു.

ഗുണപാഠം

അസൂയ നമ്മളെ പലപ്പോഴും അന്ധരാക്കുകയും ആപത്തിൽ കൊണ്ടു ചാടിക്കുകയും ചെയ്യും

Read More Stories for Kids

English Summary: The Giraffe’s Dance: Short Fables with Morals in Malayalam

In the jungle, animals planned a fun party with performances. Everyone was excited! They cheered for each act, especially the monkey’s amazing dance and tricks. But, a giraffe felt jealous and wanted attention too. When the giraffe tried to dance, it turned out funny, and the animals didn’t like it. This Malayalam fable teaches us about envy and the importance of embracing who we are.

Leave a Comment

1 Comment on ജിറാഫിന്റെ നൃത്തം