ആനയുടെ തുമ്പിക്കൈയുടെ രഹസ്യം

Folk Tales

പണ്ട് പണ്ടൊരു കാട്ടിൽ ഒരു ആനക്കുട്ടൻ ഉണ്ടായിരുന്നു. അന്ന് ആനകൾക്ക് ഇന്നു കാണുന്നതുപോലെ ഇത്രയും വലിയ തുമ്പിക്കൈയൊന്നും ഉണ്ടായിരുന്നില്ല. അതുകൊണ്ടുതന്നെ ആ ആനക്കുട്ടൻ്റെ മൂക്ക്  നമ്മൾ കാണുന്ന മറ്റു മൃഗങ്ങളുടേതു പോലെ ചെറുതായിരുന്നു. നിറയെ മൃഗങ്ങളൊക്കെയുള്ള ഒരു വലിയ കാട്ടിലായിരുന്നു നമ്മുടെ ആനക്കുട്ടൻ താമസിച്ചിരുന്നത്. മൃഗങ്ങളെല്ലാം വളരെ സന്തോഷത്തോടെയും സമാധാനത്തോടെയും ആ കാട്ടിൽ കഴിഞ്ഞു. അങ്ങനെയിരിക്കുമ്പോൾ അവിടെ കടുത്ത വേനൽ വന്നു. കുറേയേറെ നാളുകൾ ആ കാട്ടിൽ മഴപെയ്തതേ ഇല്ല. അവിടത്തെ തടാകങ്ങളും അരുവികളും നദികളും എല്ലാം വറ്റിവരളാൻ തുടങ്ങി.

എന്തു ചെയ്യണം എന്നറിയാതെ മൃഗങ്ങളെല്ലാം കുഴങ്ങി. അവർ അടുത്ത കാടുകളിലേക്ക് വെള്ളം അന്വേഷിച്ച് പോകാൻ തുടങ്ങി. ആനക്കുട്ടനും വെള്ളം അന്വേഷിച്ചു നടന്നു. ഒടുവിൽ ആനക്കുട്ടൻ ഒരു കുളക്കരയിൽ എത്തി. കുളത്തിൽ നിറയെ വെള്ളം കണ്ടതും ആന സന്തോഷത്തോടെ അങ്ങോട്ടേക്ക് ഓടിപോയി. 

“ഹായ് നിറയെ വെള്ളം, എത്ര നേരമായി വെള്ളത്തിനായി അലഞ്ഞു നടക്കുന്നു. എന്തായാലും ഇനി മതിവരുവോളം വെള്ളം കുടിക്കാമല്ലോ.”

എന്നും പറഞ്ഞ് ആന വെള്ളം കുടിക്കാൻ തുടങ്ങിയതും പെട്ടെന്ന് കുളത്തിൽ നിന്നും ഒരു അലർച്ച. ആന ശബ്ദം കേട്ട ഭാഗത്തേക്ക് നോക്കി. അതാ മുൻപിൽ നല്ല പച്ച നിറമുള്ള ഒരു മുതല. ആന ഭയന്ന് പിന്നോട്ട് മാറി. ഇതു കണ്ടതും മുതല പറഞ്ഞു

“ഇതെൻ്റെ മാത്രം കുളമാണ്. ഇവിടെ നിന്നും വെള്ളം കുടിക്കാനുള്ള അധികാരം എനിക്ക് മാത്രമാണ്. മറ്റൊരാളും ഇവിടെ നിന്നും വെള്ളം ഉപയോഗിക്കുന്നത് എനിക്കിഷ്ടമല്ല. നീ എത്രയും പെട്ടെന്ന് ഇവിടെ നിന്നു പോകണം.”

ആനക്കുട്ടൻ തൻ്റെ അവസ്ഥ മുതലയെ പറഞ്ഞു മനസ്സിലാക്കാൻ ശ്രമിച്ചു.

“കടുത്ത വേനലിൽ കാട്ടിലെ അരുവികളും തടാകങ്ങളുമെല്ലാം വറ്റി കഴിഞ്ഞു. ദാഹിച്ചുവലഞ്ഞാണ് ഇങ്ങോട്ടേക്ക് വന്നത്. ദയവായി എന്നെ ഈ കുളത്തിൽ നിന്ന് വെള്ളം കുടിക്കാൻ അനുവദിക്കണം.”

എന്നാൽ മുതല ആന പറഞ്ഞതൊന്നും ചെവിക്കൊണ്ടില്ല. ഒടുവിൽ ആനക്കുട്ടൻ കരുതി

“ഈ മുതലയോട് പറഞ്ഞിട്ടൊന്നും ഒരു കാര്യവുമില്ല. ഒരു കാര്യം ചെയ്യാം മുതല

 ഉറങ്ങുന്ന സമയം നോക്കി വരാം. ഇപ്പോൾ മുതലയുമായി കയർക്കാൻ നൽകാതെ പിൻമാറുന്നതാണ് ഉചിതം.” 

അങ്ങനെ ആന അവിടെ നിന്നു പോയി കുറച്ചകലെ മറഞ്ഞുനിന്നു. ആന പോയി കഴിഞ്ഞപ്പോൾ മുതല കുളത്തിൽ നീന്തിത്തുടിക്കാൻ തുടങ്ങി. ആ കുളത്തിൽ മുതലയോടൊപ്പം ഒരു പച്ച തവളയും ഉണ്ടായിരുന്നു. ഈ തവള എന്നും മുതല നദിയിൽ നീന്തുമ്പോൾ അതിൻ്റെ മുകളിൽ കയറിയിരിക്കുക പതിവായിരുന്നു. മുതല എത്ര ശ്രമിച്ചാലും തവള അതിൻ്റെ പുറത്തു നിന്നും ഇറങ്ങുമായിരുന്നില്ല. മുതലയുടെ പുറത്തിരുന്ന് നദിയിലെ കാഴ്ചകൾ ആസ്വദിക്കുന്നത് തവള വളരെയധികം ഇഷ്ടപ്പെട്ടിരുന്നു. എന്നാൽ ഇത് മുതലയ്ക്ക് വലിയ ശല്യമായിരുന്നു. 

അങ്ങനെയിരിക്കെ ആയിരുന്നു ആ നദിയിലേക്ക് നമ്മുടെ ആനക്കുട്ടൻ വെള്ളം കുടിക്കാനായി എത്തിയത്. മുതല ഉച്ചഭക്ഷണവും കഴിച്ചു മയങ്ങിയതും  ആന പതുക്കെ കുളക്കരയിൽ തിരിച്ചെത്തി വെള്ളം കുടിക്കാൻ തുടങ്ങി. എന്നാൽ ഈ സമയം ഇതൊന്നുമറിയാതെ കുസൃതിക്കാരനായ തവള ഉറങ്ങിക്കിടന്ന മുതലയുടെ പുറത്തുകയറി. തവള പുറത്തു കയറിയതും മുതല ഉണർന്നു. തവളയെ താഴെ ഇറക്കുന്നതിനായി മുതല കുതറാൻ തുടങ്ങി. അപ്പോഴാണ് ആന കുളത്തിൽ നിന്നും വെള്ളം കുടിക്കുന്നത് മുതലയുടെ ശ്രദ്ധയിൽപ്പെട്ടത്. ഉടൻതന്നെ മുതല തവളയെ കുടഞ്ഞു താഴെയിട്ടു. തവളയോടുള്ള ദേഷ്യത്തിൽ നിന്ന മുതല ആന വെള്ളം കുടിക്കുന്നത് കൂടി കണ്ടപ്പോൾ അതിൻ്റെ ദേഷ്യം ഇരട്ടിച്ചു. ഉടൻതന്നെ മുതല ആനയുടെ മൂക്കിൽ ചാടി കടിച്ചു. കടികൊണ്ട നമ്മുടെ പാവം ആനക്കുട്ടൻ മുതലയുടെ പിടിയിൽ നിന്നു രക്ഷപ്പെടുന്നതിനായി സർവ്വശക്തിയുമെടുത്ത് പുറകിലോട്ട് ആഞ്ഞു. മുതലയുണ്ടോ പിടിവിടുന്നു. അവസാനം കുറച്ചുനേരത്തെ മൽപ്പിടുത്തത്തിനു ശേഷം വല്ലവിധേനയും ആന മുതലയുടെ പിടിയിൽ നിന്നു രക്ഷപെട്ടു. അപ്പോഴാണ് ആനക്കുട്ടൻ കടിയേറ്റ തൻ്റെ മൂക്ക് ശ്രേദ്ധിച്ചത്. മൂക്കിന് ഒരുപാട് നീളം വച്ചിരിക്കുന്നു. ഇതുകണ്ട ആനയ്ക്ക് വല്ലാത്ത ദേഷ്യവും സങ്കടവുമായി. 

സങ്കടവും ദേഷ്യവും സഹിക്കാൻ വയ്യാതെ ആന ആ കുളത്തിലെ വെള്ളം മുഴുവൻ ഒറ്റവലിക്ക് കുടിച്ചുവറ്റിച്ചു. എന്നിട്ടും അരിശം മാറാതെ അവൻ കുളത്തിൽ നിന്നും കുറേ ചെളിവാരിയെടുത്ത്‌  മുതലയുടെയും തവളയുടെയും ദേഹത്തെറിഞ്ഞു. മുതലയുടെയും തവളയുടെയും ദേഹമാകെ ചെളി വീണു. അതോടെ നല്ല പച്ച നിറമായിരുന്നു മുതലയുടെയും തവളയുടെയും ദേഹമാകെ ചെളിയുടെ നിറം പറ്റിപിടിച്ചു. അവർ എത്ര ശ്രമിച്ചിട്ടും ആ നിറം അവരുടെ ശരീരത്തിൽ നിന്നും പോയതുമില്ല. അന്നുവരെ നല്ല ഭംഗിയുള്ള പച്ചനിറവുമായി നടന്ന മുതലയും തവളയും ചെളിപറ്റിയ നിറവുമായി നടക്കാൻ തുടങ്ങി. മാത്രമല്ല തുടർന്നങ്ങോട്ടുള്ള എല്ലാ മുതലകൾക്കും തവളകൾക്കും ചെളിപറ്റിയ നിറമാവുകയും ചെയ്തു.

നമ്മുടെ ആനക്കുട്ടൻ്റെ കാര്യവും വ്യത്യസ്തമായിരുന്നില്ല. മുതല പിടിച്ചപ്പോൾ വലുതായ ആനയുടെ മൂക്ക് നീണ്ടുതന്നെയിരുന്നു. അതൊരിക്കലും പഴയതുപോലെ ആയില്ല. അതു വളർന്നു തുമ്പിക്കൈയായി മാറി. അങ്ങനെയാണത്ര നമ്മുടെ ആനകൾക്ക് നല്ല ഭംഗിയുള്ള തുമ്പികൈകൾ ഉണ്ടായത്.

Read More Short Bedtime Stories

English Summary: Short bedtime stories in Malayalam. The Elephants Nose is one of the best short bedtime stories to tell to children. No doubt kids will love such short bedtime stories.

Leave a Comment

2 Comments on ആനയുടെ തുമ്പിക്കൈയുടെ രഹസ്യം